مرت سنه ..!!

غداً الله يسهل على الجميع أول يوم في الإختبارات يعني حالة استنفار و طوارئ في البيت و الشارع و المدارس , بالنسبه لبيتنا حالة الإستنفار أقل مما كانت عليه في السابق ” لأن عبدالرحمن أخوي الله يحفظه بجامعة القصيم ” وَ لاّ أول وَ بالتحديد قبل سنه أيام ما كان عبدالرحمن بثالث ثانوي كانت حالتنا صعبه من جد يالله كل ما اتذكر السالفة أقول الله لا يعيدها من أيام … أذكر أني كنت إذا جيت من الدوام الساعة أربع أجهز له الكوفي و شئ ” سناك ” نبدأ بعدها مشوار الألف ميل بس كان مشوار طويل ينتهي معنا الفجر قد اضطر عندها أني أروح للعمل و أنا مواصلة -) يعني كلي نوم .. افتح عين وَ اسكر عين .. بس فالحة أمر بطريقي على ستاربكس وَ لاّ د.كيف أخذ لي شئ يعدل رأسي وَ يصحصحني ( كم حاء وَ صاد في الكلمة .. ههههه ) ماعلينا نرجع للب الموضوع .. الحمد لله انه ماكان عندي في ذيك الفترة مرضى كثيرين وَ لاّ كان صارت علوم … ما اصدق ينتهي عشان ارجع للبيت وَ اروح في سبات عميق لكن مع ذلك ما اصبر لازم اشوف عبدالرحمن وش انجز ( وش الله مشقيني .. لا تسألوني لأني ما أدري ؟ ) .. بعض الأيام وَ أنا في الدوام اتصل عليه اشوف وش صار معاه .. ما اصبر و عند المرضى اقوله حليت زين وَ لاّ لا ؟ .. كتبت كذا و كذا كتبت هذا القانون وَ لاّ لا ؟ .. أحياناً توصل معي أني أرفع صوتي .. فالطبيعي انّ كل أمة لا إله إلا الله راح يقولون الله لا يبلانا وش ذا الآدمية ؟ .. طبعاً ما يدرون باللي داخلي و الحرة اللي فيني شوي وً أدخل بالتليفون , يالله الحمد انتهت على خير وَ صارت كلها سوالف . الحين طبعاً أختي ( آخر العنقود .. سكر معقود 🙂 ) هي الحين بثاني ثانوي بس مسكينة ما نعطيها وجه مثل أخوي لأنها ماشاء الله عليه ما تحتاج حريصة ما عليها ( اللهم إذا طلع فيلم في4 وَ لاّ 2 تروح تنقذ ) .. نكمل لكثر ماحنا ساحبين عليها وَ معطينها خامس ( خامس وَ لاّ سادس .. هههههههه ) أمس تقولي في كارفور ( عندي سالفة عن كارفور برجع لها ) أنها تبغى تشتري أشياء للإختبارات .. قلت لها أقلام وَ شريتيها وش تبغين بعد ؟ .. قالت لا أبغى أشتري أشياء سناك أتسلى فيهم لحد ما تجي أمي من العمل .. يا عمري رحمتها 😦 .. بس خربتها يوم قالت وَ لاّ أنا مالي حق مثل عبدالرحمن .. هو ما شاء الله اللي يقوله و اللي ما يقوله تسوون له ) و الله ماهي سهلة تاخذ حقها . المهم انهم يخلصون وَ نرتاح احس كأن شئ حابس على أنفاسنا . نرجع لعبدالرحمن تدرون وش الميزة من متابعتي لمذاكرته اني اكتشفت انه عند ماده روعه بس للأسف ما قدرها .. هي الجيولوجيا .. ممتعه بصراحة خسارة شكلها ماحد مقدرها .
ياربي توفقهم و تيسر لهم أمورهم لينالوا مرادهم
خارج الموضوع :
صح سالفة كارفور ” للمرة ثانية على التوالي ” أوصلهم قبل اذان العشاء بربع ساعة على ما أدور الأغراض اللي أبغاها إلا بقى 5 دقايق المهم وصلت لكاشير 10 item وَ صفيت العربانه إلا يقول لي خلاص بعد الصلاة .. يعني مضطرة انطق لحد ما تخلص الصلاة .. المهم يجي المدير الأمريكي وَ يقول راح تنتظرين 25 دقيقة .. قلت أجل وش أقدر اسوي ؟ .. قال و انا بعد وش اقدر اسوي ؟ .. قلت له لا سلامتك .ه يالله بحرم اروح لهم .. خلاص توبه.

دمت بود

6 تعليقات to “مرت سنه ..!!”

  1. ph.assola Says:

    الامتحانات مكهربه الجو عندنا…. العام الماضي كانت اختي ثانويه عامه وسوت لنا فيها مسلسل الشهد والدموع كل شوي مغمى عليها واعصابها مشدوده والمستوصف الي جنب البيت سوا لنا خصم من كثر ما تطيح علينا…. (شر البليه مايضحك).
    السنه هذي عندنا الحلوه الثانيه من جد تغيير …الى يوم الاربعاء وهي ما هي عارفه وش عليها السبت..(no commentهذي انا…)لا وتقول بعد واقتبس:يقولون رياضيات..!!!!!!!!!!!!
    طبعا دقيت على وحده من البنات الي اختها مدرسه رياضيات وسالتها قالت لي الجداول موحده واول ماده رياضيات..
    قالت الحلوه:شفتو الناس يقولون زيي!!

  2. ahmad Says:

    الله لا يعيد ذيك الايام

    الحين تجي الاختبارات ولا ندري عنها الا من الجرايد 🙂 ، البيت خلاص مافيه احد كلهم جامعة وفوق

    مسرع كبرنا ، ولا اول كل البيت نذاكر وقلق وأزمة

  3. محمد Says:

    يا الله ..

    أتذكر أني مهمل كبيييير أيام الدراسة ..
    ما أعطي الكتب وجه ولا أذاكر ألا قبل الإختبار بيوم 🙂 ..

    أتمنى هالعادة تتبطل من عندي 😀

    جهدك مع أخوك شيء يستحق الفخر فعلاً..
    ماشاء الله عليك..
    الله لايحرمك الأجر : )

  4. 5arbasha Says:

    ph.assola: بس شلون ما تراجع المواد و الله غلط لازم الواحد يحرص و يرتب كتبه و يشوف وش اللي عليه . على العموم شاكرة مرورك

  5. 5arbasha Says:

    ahmad : و الله الإختبارات ما صار لها طعم مثل أول خصوصاً بعد إلغاء اختبارات الوزارة .. شاكرة مرورك

  6. 5arbasha Says:

    محمد: مأجورين إن شاء الله .. أن شاء الله إذا صار عندي عيال هو يذاكر لهم ” أما هذي كثر منها ” :)شاكرة مرورك وَ تعليقك

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s


%d مدونون معجبون بهذه: