قررت اشتري سيارة

بس بنتلي .. غالي وَ الطلب رخيص .. إلا وش رايكم تنص�ون فيها ؟

و من الطبيعي جدا السيارة تحتاج سواق ( قولي قسم 🙂 ) .. لذلك أنا مضطرة جداً أني أبيع اللي قدامي وَ اللي وراي من أسهم وَ عقارات ( يحلفون ان رصيدي في البنك مصفّر << مائل إلى الصفرة  ) بس عشان أتخلص من معاناتي التي لازمتني أربع سنوات  .. إليكم القصة بالتفصيل خياطة تطريز << يععععععع ( تذكرت إذاعة المدرسة ) .. ماعلينا :

قبل أربع سنوات وَ قبل فترة الإمتياز ( التدريب ) بالتحديد تقرر توزيع الطالبات على 3 مستشفيات مختلفة وَ لمدة سنه كاملة وَ من سوء حظي ( و بختي المنيل مليون نيلة ) تقرر أن يكون أول مستشفى هو ….. وَ الذي يقبع ( حلوة يقبع بس لا تعيدينها مره ثانيه ) في جنوب الرياض ( يعني تقدرون تقولون   بالنسبة لبيتنا هو في قلايع وادرين ) المعاناة لا تكمن في المسافة وَ بعد المستشفى عن البيت .. بل في تضارب أوقات الدوام ( أنا وأختي – موظفة – وأختي الثانية – طالبة – وَ أخوي – طالب – وَ أمي – موظفة – << كان الله في عون السواق ) .. علاوة على ذلك جميعهم كانت المسافة بين مدارسهم وَ أماكن عملهم لا تذكر مقارنة فيني .. انتهت الفترة ( 4 أشهر ) المقرر أني أقضيها في هذا المستشفى بسلامة بس بيني وَ بينكم كنت فيها على أعصابي أخاف تخرب السيارة وَ بعدين يقولون كله من مستشفى نور .. بعدها انتقلت لمستشفى ثاني وَ لـ أربعة أشهر اخرى ( شهرين داومتهم وَ شهرين طنشتهم << أفهموها 🙂 ) وَ الله حتى هذا المستشفى مشواره مو هين ( بس أهون من الأول يكفي أنه في شمال الرياض 🙂 ) .. في الـ 4 أشهر الأخيره ربي رحم حالي فيها لأن المستشفى كان قريب من مستشفى أختي فأزمة المواصلات في تلك الفترة تقلصت .. هل انتهت سنة الإمتياز ؟؟  لم تنتهي فلا يزال هناك الشهرين اللي طنشتهم ( تذكرون ؟) قضيتهم أيضاً في مستشفى قريب من عمل أختي .. بكذا انتهت فترة الإمتياز وَ نقدر نقول عدت على خير .. بعدها بسنة حصلت على وظيفة في أحد المستشفيات وَ حزروا وين ؟؟ جنوب الرياض مره ثانيه ( قايلتلكم حظي منيل ما صدقتوني ) صح نسيت أقولكم أنها قبلها بفترة شرينا موتور جديد ( حلوه موتور حسيتها مصطلح ذكوري 🙂 ) يعني تيك كير ما في مشاوير بعيدة وَ لا مشاوير منا وَ لا منا ( و الله هذي نظريتهم مع أني اسمع عن ناس يروحون للشرقية عشان يطيحون الماكينة  .. صح وَ لا أنا غلطانه) .. ما علينا .. اجتمعت الظروف سيارة جديدة , تضارب مواعيد وَ مكان العمل بعيد .. قلت في نفسي يا نور من مبدأ ابعد عن الشر وَ غنيله .. حطي لك سواق ( إمام ) يوديك للدوام  .. وَ امنا بالله و حطيناه وَ الرجعة سواقنا ياخذني .. استمريت على هالوضعية حتى طرأ ما لم يكن في الحسبان .. سواق العائلة ( يوسف ) قرر السفر بعد أنهى سنتين من الخدمة .. يا ويلي من راح ياخذني من الدوام .. بعد هات وَ خذ وَ مشاورات وَ اجتماعات عائلية تقرر أن أخوي الكبير هو اللي راح ياخذني .. 6 أشهر حتى جاء قرار وظيفتي الجديدة اللي هي في إحدى محافظات الرياض .. شهرين وَ دبرت لي نقل للرياض ( ايه دبرت لا تناظروني كذا ) .. انتقلت للرياض وَ للمره الثالثة جنوب الرياض ( لا تقولين  .. و الله العظيم ) .. تذكرون هذاك السواق اللي حطيتها جبته مره ثانيه حتى هو ( بذاتُه ) استغرب من العلاقة اللي بيني وَ بين جنوب الرياض ( وَ الله علمي علمك يا إمام ) .. فترة وجيزة وَ سولت لي نفسي أن استغني عن ( إمام ) وَ اتعامل مع نفس السواق ( أبو أحمد ) اللي يتعاملون معه اثنتين من زميلاتي في العمل .. آآآآآآآآآآآآه اعض أصابع الندم الواحد تلو الآخر لأني تعاملت معه .. أبو أحمد وَ زوجته المصونه أشخاص غريبين الأطوار .. كيف ؟؟ .. راح أقولكم كيف .. أول شئ اذا اتصلت عليهم وَ قالوا لي عند البيت فلازم احط في بالي أن يبغالهم عشر دقايق حتى يوصلون للبيت .. اذا اتصلت عليهم وَ ما ردوا عليّ فلازم اعرف أنهم ما راح يردون عشان ما يخسروني ( أحد اشتكى لهم ) بحجة أنهم قريبين من عند البيت مع أنه يبغالهم 10 دقايق .. اذا تأخروا عليّ في الدوام فلازم اعرف أنهم في مهمه إنسانية وَ هي إطعام الكلاب اللي حولي المستشفى .. آآآآآآآه نسيت .. على نهاية الدوام  إذا اتصلت عليهم وَ سألتهم وينكم فيه وَ قالوا : يوووووووه في زحمه باينته حادث .. من البديهي جداً أن أعرف أنهم توهم طالعين من البيت .. هذا غير مواقف وَ سوالف ترفع الضغط خلتني افكر جدياً في أن اشتري سيارة ( الله لا يعوق من شر ) و احط لي سواق و اريح نفسي لأني بصراحة طفشت ..
المشكلة الحين محتاره وش نوع السيارة اللي اشتريها ( مشكلة اللي ما تعوق معها بشئ ) 🙂
على فكرة .. يمكن البعض يلاحظ في تدوينتي مصطلحات يتداولها الشباب فيما بينهم .. هذا ان دلّ فإنه يدل على تأثير أخوي عليّ  .. وَ لا يا عبدالرحمن ؟

6 تعليقات to “قررت اشتري سيارة”

  1. خوش واحد Says:

    كح كح كح وش دخلني انا ؟؟؟؟!!!!

    بس احلى شيء ” موتور” يا وخيتي اكتبي ((موتر)) عشان تطلع ذكورية اكثر خخخخخخخخخخخخخخ

    الموتر ددسن عراوي موديل 81 و بدون مكيف مع هالأجواء الجميلة ما تحتاجينها وإلا ؟؟؟

    هههههههههههههههههههههههههه

    والله مدري بس في ضل حملة “خليها تصدي و موديلها يعدي” اصبري يمكن تنزل الأسعار ما تسوى تشترين و الأسعار نار الحين.

    بس يمدحون الكراون فكتوريا للسواقين 🙂 <<< امس قايلها كابريس و اليوم كراون؟! خخخخخخخخخخخاي

  2. quiet Says:

    الحين انا ضعت..!!! وين امام

    و وش حدك عالcouple ذا؟؟

  3. صاحب القلم Says:

    الله يكون في عونكم 😦

    فعلاً مشكلة المرأة العاملة تكون مشكلة عويصة خصوصاً إذا كان الزوج أيضاً عامل وأين .. في القطاع الخاص ولا يخرج إلا بعد العصر ..

    فالاضطرار للسواق أمر أشبه رئيسي ومهم .

    في الوقت الذي يسمح لكم بقيادة السيارة أنا ما عندي مشكلة 🙂 لكن يكبّروا الشوارع ويوسعوها وان بغيتوا تفحطوا كمان مسموحين ..

    شكراً لك

  4. 5arbasha Says:

    @خوش واحد : صدق ما عندي ما عند جدتي الحين طلع الموتر معناه ددسن .. بعدين تراهي ظل موب ضل … اوكي

    @quiet : مجبراً أخاك لا بطل 🙂

    @صاحب القلم : الحين أحد يعاف العز و الدلال و يروح للشقى .. حتى لو اسمحوا بقيادة المرأه للسياره ما راح اسوق أبشرك 🙂
    تخيل عاد اذا بغيت اروح للسوق و لا المطعم و لا حتى للمستشفى .. نزلي السيارة بالمواقف وَ قبلها يروح وقتك و انت تدور ع الموقف وَ غير صيانة السيارة … يوووووه سالفة
    بالنسبة لي أعاني لما أروح مع واحد من إخواني

  5. ayman zarif Says:

    خخخخ حلوة منك بعدين معاك حقك الواحد متلك بكون عندو سواق وبروح بسوق بس ولكن لا نكون اتكالين أكثر من أللوزوم مع تحياتي ارجو بزيارة مدونتي أبيات

    http:\\2byat.wordpress.com

  6. أماني المعجل Says:

    وه بس !!
    هذي مشكلة كل بيت
    احنا نفس الشي والله يانور
    السواق مايلحق الصبح بداية الدوامات و العصر في نهاية الدوامات

    شوفي عاد أهم شي انك اذا شريتي لا تخلين أحد يقص عليك شنو كابرس و كراون و مدري شنو
    الله لا يهينك نبي مثلا لسياره اللي في الصوره لا تقصين علينا D:
    كان الله في عونكم و عون الجميع و عون إمام و يوسف بعد

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s


%d مدونون معجبون بهذه: