هذرولوجيتي 2

هذه التدوينة مختلفة عن الجزء الأول .. فهي مختلفة في الزمان وَ المكان وَحتى الظروف  .. فلا فيروز وَ لا كوب من القهوه وَ لا مسودة وَ لا محاولة سرقة اتصال من الجيران ( هالمره محترمه ) .. لا يخفى عليكم أن هذه التدوينه هي أيضاً  نتاج أحداث وَ مواقف حصلت معي وجدت من الأفضل أن احصرها في موضوع واحد ( وحدها عجّازه ) لا و الله ليس لأنني عجازة وَ لكن رأيت أن  بعض هذه المواقف لا تستحق  أن يخصص لها تدوينه منفرده ( خليهم جماعة أحسن 🙂 ) .

* لنبدأ معكم من حيث انتهينا وَ توقفنا عنده في الجزء الأول وَ هو موضوع الترقية .. بعد ان حصلت عليها أنا وَ اثنتين من زميلاتي فؤجنا في اليوم التالي بوجود ثلاثة دروع في القسم تحمل أسمائنا طبعاً كانت من رئيس القسم .. المهم استلمت الدرع و اصطحبته معي إلى المنزل .. وصلت للبيت وَ تركت الدرع على إحدى طاولات غرفة المعيشة  ( تقدرون تقولون طنشت موضوع الدرع ) وَ لا واحد في البيت عرف بسالفة الدرع إلا بعد ما يشوف الصندوق فكل واحد يجي يفتح الصندوق وَ يروح لا و الله ما يروح كذا بدون ما يهزأني وَ يبارك لي .. تبغون الصراحة ما أدري ليش تصرفت هالتصرف ؟؟

* منذ شهر تقريباً عدت لمقاعد الدراسة .. لا مو اللي في بالكم لا ما جستير وَ لا خرابيط  ( الله الحين صار الماجستير خرابيط 😦 ) .. ما علينا عدت للدراسة من أجل الحصول على التوفيل (TOFEL) .. بس تصدقون و الله حلوه الدراسة صحيح أني حسيت بالضغط عمل وَ دراسة بس كسرت الروتين .. أصبحت منظمة نوعاً ما في الوقت طبعاً .. تعرفت على أشخاص جدد .. لا يفوتكم بعد بالكلاس درجاتي حلوه وَ البنات ياخذون ملخصاتي .. لا تخيلوا ياخذونها وَ يعلقون على خطي .. وحده منهم سألتني شكلك يا نور تشتغلين في مجال طبي ؟ ..  قلت ليه ؟ .. قالت خطك مثل الأطباء مو واضح !! .. بيني وَ بينكم ضاق صدري لأن خط الأطباء مسوي أزمة معاي .. أجي في الأخير أصير مثلهم لا مستحيل ..

* وشو بعد .. ايه نسيت أقولكم أني طلعت إنسانه شريره  ( فرحانه ) .. تزوجت صديقتي المقربة جداً جداً وَ ما رحت لزواجها هذا وَ انا مواعدتها  بس لا تلوموني يعني أروح لها بالمدينه وَ الله أحسها صعبه .. مو مهم أني اروح  صح المهم ان ربي يسعدها<< تصريفه 😀

* هذه الفتره افكر جدياً بتغيير لوك مدونتي .. لذلك أدور حالياً على شخص يتولى هذه المسؤولية لأني بصراحة ما عندي وقت .. بعدين وراي دراسة .. تكفين !! .. ( عبدالرحمن وش رايك تتولى المهمه .. وَ مالك إلا طيبة الخاطر .. حط المبلغ اللي تبيه << يا شيخة ) .

* هذا الأسبوع تلقيت عرض مغري جداً جداً .. طبعاً هذا العرض من والدتي .. العرص عبارة رحلة سياحية  في شهر اغسطس تشمل التذاكر وَ الإقامة وَ الأكل وَ كل شئ ابيه .. بس بشرط أني أنظم الرحلة وَ أخطط لها من طأطأ للسلام عليكم .. بس لازم يكون البرنامج يناسب أمي وَ لا تفكرين يا نور بأي شئ غير أنك تبسطين وَ تونسين امك في هالرحلة وَ لازم تعرفين الأماكن اللي تعجبها .. يعني الرحلة لأمي مو لي !! .. طيب وَ بقية الأفراد .. وَ الله بحسب نتائج اجتماع العائلة الأخير أعتقد أن اختي الكبيرة وَ الصغيرة راح يجلسون بالرياض عشان التسجيل للجامعه .. بس من جد راح أفقدهم << أول احجزي بعدين تعالي اتفلسفي .

* جا الوقت اللي أغير فيه جوالي .. بعد محاولات عدة وَ هجمات شرسة من جميع الجهات ضد جوالي قررت أشتري جوال جديد طبعاً مو بسبب الكلام اللي سمعته .. لا .. السبب أهم من كذا يكثير وَ هو أن رسائل تويتر اللي اكتبها بالجوال ما تطلع عربي ( تطلع لغة غريبة ) لذلك اضطر أني اكتب بالإنجليزي .. اكتشفت ان العيب من الجوال <<  شوفوا الناس الفاهمه يشخصون المرض بسرعه  .. يمديكم بس 🙂

*  اليوم توجهت أنا وَ أخت للأحوال المدنية .. ليش يا ترى ؟؟ عشان نطلع بطاقة شخصية ( رجاءً لا تقولون يوووووووه .. وَ لا صح النوم ) .. طبعاً لا يفوتكم طلعت من البيت 9 وَ ربع وَ صلنا هناك 10 وَ شئ ( عاد شئ هذي حطوها زي ما تبغون ) .. وَ عقاباً لنا وَ ردعاً لأمثالنا وَ لأننا جينا متأخر التقديم انتهى لليوم تعالوا بكره الساعة 7 صباحاً  .. هنا نقول يووووه لسببين أول شئ أني راح آخذ إجازة وَ هذا معناه أن رصيدي في الإجازات راح يقل  وَ السبب الثاني إني ماراح أشبع نوم هذا إذا نمت بعد .

* كون رحلتنا للأحوال المدنية باءت بالفشل .. قررت أختي تروح لمجمع غرناطة حتى ترجع شغلة من دبنهامز .. المهم الكاشير اللي هناك استقعد لها قال : مدام وين الهديه اللي عطيناك إياها .. ردت أختي : ما جبتها ( نسيت أقولكم ان أختي رجعت قطعة واحده من أصل 3 .. يعني الهديه حلال عليها ) .. ما علينا قال   الكاشير : مدام ما نرجع لك القطعة لحد ما تجيبين الهديه ؟؟ << من جدهم هذولي .. طبعاً بعد محاولات عده وَ اتصالات .. قال الكاشير : نحنا آسفين مدام وَ راح نرجعلك القطعة  ( على فكره هالحركة ثاني مره يسوونها مع أختي ) .. وَ طول ما أختي تتناقش معاهم انا واقفه أفكر في عده تصلح للسفر من سمسونايت أشتريها وَ لا لا .. طبعاً شريتها لأنها بصراحة ما تتفوت   .

* قبل لا أختم موضوعي ودي أقولكم أني أعاني من مشكلة وَ هي أني احتار دائماً في كتابة  عنوان لتدويناتي

هذا كل ما لدي دمتم بخير

5 تعليقات to “هذرولوجيتي 2”

  1. صاحب القلم Says:

    جميلة هذه الهذرولجات 🙂

    وبصراحة عندي مشكلة في التويتر انه ما يعطيني امكانية ارسال الرسائل على جوالي، فهل هذي طبيعية ؟! يعني لازم اشوف التويتر من اللاب توب ؟!

    ويبدو ما شاء الله لك خبرة كبيرة في السياحة .. فما هي الاماكن التي تنصحينا بها ؟!

    والأحوال المدنية 😦

    الضرب في الميت حرام

  2. سلطان Says:

    .
    .
    .
    بالنسبة للنقطة ما قبل الأخيرة … فبيتنا مليااااان من الشنط هذي ، و السبب أنا كل يوم مشتري نوع 🙂

  3. 5arbasha Says:

    @ صاحب القلم : تقصد مشكلتك في تويتر انك ما تقدر تستقبل الرسائل من تويتر على جوالك .. إذا كانت هذي مشكلتك بامكانك ترجع لصفحة الرئيسية لتويتر و منها الى ( المساعده ) وَ أعتقد هذي الصفحة راح تلاقي فيها الحل
    http://help.twitter.com/forums/10711/entries/14020

    بعدين بالنسبة لخبرتي في السفر فالله لا يحرمنا من العرب المسافرون يعني ما هي شطارة مني

    @ سلطان : هذا يدل أنك واحد تحب السفر وَ تحب كل شئ يتعلق بالسفر .. يعني زي حلاتي 😀

  4. quiet Says:

    اولا…كيفك
    ثانيا انا قصيت بطاقه يوم الاحد<>
    انتي قبلي ولا بعد؟؟ لايكون كنا سوا وانا مو عارفه!!

    نسيت اقولك

    انا كمان هذا الاسبوع خلصت دوره التوفل بعد شهر
    عصييييييب

    وش الحل في هالتخاطر ؟؟

  5. 5arbasha Says:

    @ quiet : وَ انا أقول وش فيها البنت لا حس وَ لاخبر أثري دورة التوفل مشغلتك عننا
    بعدين أنا طلعت البطاقة يوم 26 فبراير يعني يوم الأربعاء .. يعني سابقتك 🙂

    على فكرة مسألة هالتخاطر هذي مشغلتني وَ مع ناس غيرك ما أدري وش السبب .. يمكن البرج له دخل بالسالفة .. إلا وش قلتي برجك ?? .. كأني أذكر أنه السرطان وَ لا 😀

اترك تعليقًا

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار ووردبريس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s


%d مدونون معجبون بهذه: